Aundha Nagnath Temple Closed for One Month: प्रसिद्ध तीर्थक्षेत्र औंढा नागनाथ मंदिर महिनाभर बंद; 5 ऑक्टोबरपासून दर्शन नाही, जाणून घ्या नेमकं कारण काय?

<p><strong>Hingoli:</strong> बारा ज्योतिर्लिंगांपैकी असणारे हिंगोली जिल्ह्यातील (Hingoli) औंढा नागनाथ (Aundha Nagnath Temple Closed) येथील मंदिरात दर्शनासाठी जाणाऱ्या भाविकांसाठी महत्त्वाची बातमी आहे. मंदिराच्या गर्भगृहातील दुरुस्ती, स्वच्छता आणि संवर्धनाचे काम हाती घेण्यात येणार असून, त्यासाठी 5 ऑक्टोबरपासून मंदिरातील दर्शन महिनाभर बंद ठेवण्यात येणार आहे. मात्र मंदिरातील नित्य पूजा-अर्चा नियमितपणे सुरू राहणार आहे.</p> <p><strong>कारण काय?</strong></p> <p>औंढा नागनाथ हे प्राचीन आणि ऐतिहासिक महत्त्व असलेले मंदिर आहे. मंदिराच्या गर्भगृहातील दगडी भिंती, खांब तसेच इतर वास्तू घटकांवर अनेक वर्षांच्या पूजा-अर्चेमुळे तेल, कुंकू, हळद आणि पूजेच्या इतर साहित्याचे थर साचले आहेत. त्यामुळे मंदिराच्या मूळ वास्तूचे संवर्धन करण्याच्या दृष्टीने आता विशेष स्वच्छता आणि दुरुस्तीचे काम हाती घेण्यात आले आहे.</p> <p>पुरातत्त्व विभागाच्या माध्यमातून हे संवर्धनाचे काम करण्यात येणार आहे. गर्भगृहातील भिंती आणि खांबांवर साचलेले थर आणि डाग विशेष रासायनिक प्रक्रियेच्या सहाय्याने काढण्यात येणार आहेत. ही प्रक्रिया करताना मंदिराच्या प्राचीन दगडी वास्तूला कोणतीही हानी होऊ नये, याची विशेष काळजी घेतली जाणार आहे.</p> <p><strong>संवर्धनासाठी भाविकांसाठी मंदिर महिनाभरासाठी बंद</strong></p> <p>या कामामुळे भाविकांना गर्भगृहात प्रवेश करून थेट दर्शन घेता येणार नाही. त्यामुळे पुढील महिनाभर मंदिर दर्शनासाठी बंद राहणार आहे. मात्र मंदिर बंद असतानाही भगवान नागनाथांची नित्य पूजा खंडित होणार नाही.</p> <p>सकाळची आणि दुपारची पूजा मुख्य पुजाऱ्यांच्या हस्ते नेहमीप्रमाणे पार पडणार आहे. त्यामुळे भाविकांसाठी मंदिराचे दरवाजे बंद असले, तरी गर्भगृहातील धार्मिक विधी आणि नित्यसेवा नियमित सुरू राहणार आहे. मंदिराच्या प्राचीन वास्तूचे जतन आणि संवर्धन करण्याच्या दृष्टीने हे काम महत्त्वाचे मानले जात आहे. त्यामुळे भाविकांनी पुढील महिनाभर दर्शनासाठी येण्यापूर्वी मंदिर प्रशासनाकडून मिळणाऱ्या सूचनांची माहिती घेणे आवश्यक ठरणार आहे.</p>