<p><strong>Maharashtra Weather Updates:</strong> मराठवाड्यात गेल्या दीड महिन्यांच्या विश्रांतीनंतर पावसाच्या हलक्या सरी कोसळल्या. पावसाच्या आगमनामुळे शेतकरी सुखावला आहे. परभणी, लातूर, हिंगोली, धाराशिव आणि जालनामध्ये पावसाची हजेरी पाहायला मिळाली. (Marathwada Rain Updates)</p>
<h2>परभणीत जवळपास 40 दिवसानंतर पावसाची हजेरी- (Rain In Parbhani)</h2>
<p>परभणी जिल्ह्यात तब्बल जवळपास 40 दिवसांच्या प्रतीक्षेनंतर अखेर पावसाने हजेरी लावली आहे. पहाटेपासून परभणी शहरासह जिल्ह्यातील विविध भागांत संततधार पाऊस सुरू असून, दीर्घ प्रतीक्षेनंतर झालेल्या या पावसामुळे वातावरणात मोठा बदल झाला आहे. गेल्या अनेक दिवसांपासून पावसाने दडी मारल्याने जिल्ह्यातील खरीप पिक हातून गेली आहेत. काही भागात सोयाबीन, कापूस, तूर यासह विविध पिकांना पाण्याची मोठी गरज होती अशातच आज पहाटेपासून सुरू झालेल्या पावसामुळे शेतकऱ्यांच्या आशा पुन्हा पल्लवित झाल्या आहेत. संततधार पावसामुळे जमिनीतील ओलावा वाढण्यास मदत होणार असून, पिकांना या पावसाचा कितपत फायदा होतो, हे आगामी काही तासांतील पावसाच्या प्रमाणावर अवलंबून असणार आहे. मात्र सध्या तरी जवळपास 40 दिवसांनंतर पाऊस झाल्याने सर्वसामान्य <a title="परभणी" href="https://marathi.abplive.com/topic/parbhani" data-type="interlinkingkeywords">परभणी</a>कर सुखावला आहे.</p>
<h2>लातूर शहर आणि परिसरात दीड महिन्याच्या मोठ्या खंडानंतर अखेर पावसाची हजेरी- (Rain In Latur)</h2>
<p>लातूर शहर आणि परिसरात दीड महिन्याच्या मोठ्या खंडानंतर अखेर पावसाने हजेरी लावली. रात्री दीड वाजल्यानंतर ढगांच्या गडगडाटासह हलक्या ते मध्यम स्वरूपाच्या पावसाच्या सरी बरसत आहेत. पावसामुळे वातावरणात गारवा निर्माण झाला असून, उकाड्याने हैराण झालेल्या लातूरकरांना काहीसा दिलासा मिळाला आहे. मागील काही दिवसांपासून <a title="लातूर" href="https://marathi.abplive.com/latur" data-type="interlinkingkeywords">लातूर</a> जिल्ह्यात प्रचंड उकाडा जाणवत होता. वाढत्या उन्हामुळे नागरिक त्रस्त झाले होते. अशातच मध्यरात्रीनंतर सुरू झालेल्या पावसाने वातावरण बदलून टाकले आहे. जोरदार वारे आणि ढगांच्या गडगडाटासह पाऊस सुरू असल्याने शहरातील अनेक भागांतील वीजपुरवठा खंडित झाला आहे.</p>
<h2>हिंगोली जिल्ह्यातही वादळी वाऱ्यासह पाऊस- (Rain In Hingoli)</h2>
<p>हिंगोली जिल्ह्यात गेल्या दीड महिन्यापासून पावसाने दडी मारल्याने शेतकऱ्यांच्या डोळ्यात चिंतेचं पाणी होतं. मात्र गणरायाच्या आगमनासोबतच वरुणराजानेही हजेरी लावल्याने शेतकऱ्यांना मोठा दिलासा मिळाला आहे. रात्रीपासून हिंगोली जिल्ह्यात अनेक भागांत जोरदार पावसाने हजेरी लावली आहे.विजांचा कडकडाट आणि वादळी वाऱ्यासह बरसणाऱ्या या पावसामुळे कोमेजून गेलेल्या खरीप पिकांना जिवदान मिळण्याची आशा निर्माण झाली आहे. गेल्या दीड महिन्यापासून पाऊस नसल्याने सर्वाधिक फटका सोयाबीन पिकाला बसला होता. अनेक ठिकाणी पिकं माना टाकत होती, तर शेतकरी आभाळाकडे डोळे लावून बसला होता. अशातच रात्रीपासून सुरू झालेल्या पावसाने शेतकऱ्यांच्या चेहऱ्यावर पुन्हा आनंद आणला आहे. ज्या पावसाची शेतकरी आतुरतेने वाट पाहत होता तोच पाऊस अखेर बरसला. त्यामुळे पिकांना काही प्रमाणात का होईना नवसंजीवनी मिळण्याची शक्यता आहे.</p>
<h2>धाराशिवसह परिसरात मध्यरात्री हलक्या स्वरूपाचा पाऊस- (Rain In Dharashiv)</h2>
<p><a title="धाराशिव" href="https://marathi.abplive.com/news/dharashiv" data-type="interlinkingkeywords">धाराशिव</a>मध्ये गेल्या दीड महिन्याहून अधिक काळापासून जमीन पावसाच्या एका थेंबासाठी तहानलेली आहे.तर शेतकरीही चातकाप्रमाणे पावसाची वाट पाहत आहे. मात्र गौराईचं आगमन झालं आणि तिच्यासह पावसाचंही आगमन झालं. मध्यरात्री हलक्या स्वरूपाच्या सरी जिल्ह्यामध्ये बरसल्या. जमिनीची तहान मोठी आहे आणि पडलेला पाऊस अतिशय तुटपुंजा आहे. या पावसानं ती तहान भागली जाणार नाही. मात्र पूर्णपणे पाठ फिरवलेल्या पावसाचे गौराईसह आगमन झाल्याने शेतकऱ्यांमध्ये काहीसे समाधानाचे संकेत आहेत. पुढील काळात मोठा पाऊस होऊन दुष्काळ धुवून निघावा अशी भावना शेतकऱ्यांमध्ये आहे. मध्यरात्री हलक्या स्वरूपाच्या सरी बरसल्या. शेतकरी चातकाप्रमाणे चांगल्या पावसाची वाट पाहत आहे.</p>
<h2>जालना शहर आणि परिसरात दमदार पाऊस- (Rain In Jalna)</h2>
<p>जालना शहर आणि परिसरात जोरदार पावसाला सुरुवात झाली असून. अनेक दिवसांच्या खंडानंतर जालन्यात दमदार पावसाच आगमन झाला. काल सकाळपासूनच शहर आणि परिसरात ढगाळ वातावरण होते. एक तासापासून जालना शहर आणि परिसरात जोरदार पाऊस बरसलेला पाहायला मिळतोय. जालना तालुक्यासह अंबड तालुक्यातील अनेक गावांमध्येही पावसाने हजेरी लावली आहे. पावसाअभावी रानातील पिक करपू लागल्याने शेतकरी चिंतेत होते. त्यामुळे आज झालेल्या या पावसामुळे पिकांना काही प्रमाणात का होईना दिलासा मिळण्याची शक्यता आहे. </p>
<h2>राज्यासह देश-विदेशातील महत्वाच्या घडामोडी, VIDEO:</h2>
<p><iframe title="YouTube video player" src="https://www.youtube.com/embed/a5B0FhXuLoY?si=t2lBoLk3ZrKtOBzn" width="560" height="315" frameborder="0" allowfullscreen="allowfullscreen"></iframe></p>
<h2>संबंधित बातमी:</h2>
<p class="abp-article-title"><strong><a href="https://marathi.abplive.com/news/nagpur/rain-update-worrying-news-for-farmers-rain-to-remain-absent-for-the-next-15-days-nagpur-observatory-advises-farmers-not-to-wait-for-rainfall-1439142">Rain Update: बळीराजाची चिंता वाढवणारी बातमी; पुढील 15 दिवस पाऊस मारणार दडी, नागपूर वेधशाळेनं शेतकऱ्यांना दिला पावसाची वाट न पाहण्याचा सल्ला</a></strong></p>
1 month ago
4 
