<p><strong>Raj Thackeray On Sahil Wakode:</strong> मुंबई येथे आयआयटीच्या द्वितीय वर्षात शिकणाऱ्या <a title="यवतमाळ" href="https://marathi.abplive.com/topic/yavatmal" data-type="interlinkingkeywords">यवतमाळ</a>च्या साहिल वाकोडे (Sahil Wakode) या विद्यार्थ्याने गळफास लावून 18 सप्टेंबर रोजी आत्महत्या केली. सदर घटनेनंतर एकच खळबळ उडाली आहे. परीक्षेदरम्यान मोबाइलचा वापर केल्याचा आरोप झाल्यानंतर या विद्यार्थ्याने हे टोकाचे पाऊल उचलल्याचं बोललं जात आहे. या सगळ्या प्रकरणावर आता मनसेप्रमुख राज ठाकरे (Raj Thackeray) यांनी प्रतिक्रिया दिली आहे. साहिल वाकोडे याचा मृत्यू दुर्दैवी आहे. जे घडलं ते या शिक्षण व्यवस्थेतील आपणच निर्माण केलेल्या दोषांमुळे घडलं. यावर काम करणं हीच साहिल वाकोडे आणि त्याच्यासारख्या अनेकांनी ज्यांनी ताण सहन न होऊन स्वतःचा जीव दिला आहे त्यांना श्रद्धांजली ठरेल, असं राज ठाकरे सोशल मीडियावर पोस्ट करत म्हणाले. (Raj Thackeray On Sahil Wakode)</p>
<p>आयआयटी मुंबईमध्ये साहिल वाकोडे या वीस वर्षांच्या विद्यार्थ्याने आत्महत्या केल्याची अत्यंत दुर्दैवी घटना घडली. परीक्षेदरम्यान त्याने मोबाईल आणि चॅटजीपीटीचा वापर केल्याचा आरोप आयआयटी प्रशासनाने सुरुवातीला केला. हा आरोप तपास पूर्ण होण्याआधी जाहीर करणं अयोग्य होतं, हे मान्य करत प्रशासनाने नंतर माफीही मागितली. दुसरीकडे साहिलच्या कुटुंबीयांनी जातीय छळाचे आरोप केले आहेत. त्या आरोपांवर गुन्हा दाखल झाला असून तपास सुरू आहे. प्राध्यापकांनीही आपली बाजू मांडली आहे. या सगळ्या प्रकरणात एक तरुण मुलगा आपल्यातून गेला, त्याला थेट आत्महत्येचा मार्गच का स्वीकारावासा वाटला यावर कोणीच बोलताना दिसत नाही, असं राज ठाकरे म्हणाले. तसेच एखादा विद्यार्थी परीक्षेत गैरप्रकार करत असेल, तर त्याला रोखणं आणि त्याच्यावर नियमानुसार कारवाई करणं हे प्राध्यापकांचं कर्तव्यच आहे. पण आरोप सिद्ध होण्याआधी मृत विद्यार्थ्याला गुन्हेगार ठरवणं योग्य नाही. त्याचप्रमाणे जातीय छळाचा आरोप झाला म्हणून चौकशी पूर्ण होण्याआधी प्राध्यापकांना दोषी ठरवणंही योग्य नाही. पण या सगळ्याचा कुठेच विचार होत नाही. कारण या विषयांत आता 'जात' हा मुद्दा पुढे आणून, एका वीस वर्षांच्या मुलाला एका प्रसंगानंतर आपल्या आयुष्याचे सगळे मार्ग संपले आहेत, असं का वाटलं असेल? यावर बोलायचं नाहीये. विचार करायचा नाहीय, असं राज ठाकरेंनी सांगितलं. </p>
<h2>स्पर्धा परीक्षा जीवघेण्या होत चालल्या आहेत- राज ठाकरे (Raj Thackeray On Sahil Wakode)</h2>
<p>मी अनेकदा माझ्या भाषणांमध्ये सांगितलं आहे की 2000 सालानंतर <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a>ात जात इतकी फोफावली आहे की आपल्या शेजारी शाळेत बसणारा विद्यार्थी कुठल्या जातीचा आहे हे सांगू लागलेत, वर्षानुवर्षे एकत्र डबा खाणारे ऑफिसमधले कर्मचारी जातीच्या नजरेतून एक दुसऱ्यांकडे पहायला लागलेत. आणि हे इतकं विषारी होत चाललं आहे की हे आता आयआयटीपर्यंत पोहचलं आहे. पंडित नेहरूंनी आयआयटीचं वर्णन आधुनिक भारताची मंदिरं असं केलं होतं त्या आयआयटीत विद्यार्थ्यांची आत्महत्या झाली, एक सहकारी आपल्यातून गेला यापेक्षा हे सगळं जातीतून घडलं हा पैलू पुढे यावा, यासारखं दुर्दैव नाही. मुळात आयआयटी असो की त्याच्या आधीच्या कुठल्याही स्पर्धा परीक्षा असोत या जीवघेण्या होत चालल्या आहेत. काही शे सीट्ससाठी लाखो विद्यार्थी बसतात, त्यातून निवड झाली की अभ्यासाचं ओझं, मग कॅम्पस सिलेक्शनमध्ये काय होईल याचा ताण. त्यात आयआयटी असो की आयआयएम असो पूर्वीसारखे कॅम्पस निवडीत उत्तम पगार मिळत नाही. बरं हे नैराश्य फक्त आयआयटी विद्यार्थ्यांनाच आहे असं नाही तर ते सर्वत्र आहे. अगदी कॉमर्स, आर्टस् शाखेच्या विद्यार्थ्यांपासून ते डॉक्टर्स, इंजिनिअर्सपर्यंत सगळ्यांना याचा ताण आहे. या नैराश्यातून साहिलने आत्महत्या केली. त्यामुळे या एकूणच पूर्णपणे मोडकळीस आलेल्या शिक्षण व्यवस्थेला प्रश्न विचारून ते बदलायचं? का आत्महत्या केलेल्या विद्यार्थ्याची आणि त्याला जाब विचारणाऱ्याची जात काढत बसायची, असं मत राज ठाकरेंनी व्यक्त केलं. </p>
<h2>असल्या भानगडीत कोणीच पडू नका- राज ठाकरे (Raj Thackeray On Sahil Wakode)</h2>
<p>प्रश्न हे सरकार का ते सरकार नाहीच आहे. गेल्या 30-40 वर्षांत शिक्षणाचं बाजारीकरण करण्याच्या नादात आपण पूर्ण भारतीय शिक्षण व्यवस्थेचं अपरिमित नुकसान केलं आहे. त्यात आमूलाग्र बदल आणले पाहिजेत. याची सुरुवात नुकत्याच झालेल्या जेन झी आंदोलनातून होत आहे असं वाटत असताना हा प्रकार पुढे आला. माझी विद्यार्थ्यांना विनंती आहे की तुमच्या आंदोलनाला देशभरातून प्रतिसाद मिळाला कारण तुमचा मुद्दा हा व्यवस्थेतील दोषांवर उपाय हवा यासाठी होता. तुमचं आंदोलन हे याच मार्गाने पुढे चालू राहायला हवं. कारण तसं राहिलं तर सरकारला अनेक प्रश्नांना उत्तरं द्यावी लागतील, काही कृती पण करावी लागेल. आणि सरकारला हे करायचं आहे का ? असेल तर आनंदच आहे आणि नसेल तर जात धर्म ही अमोघ अस्त्र त्यांच्याकडे आहेतच. एकदा जात धर्म आणला की विषय भरकटवायला सोपा होतो. असल्या भानगडीत कोणीच पडू नका, असं राज ठाकरे म्हणाले. </p>
<blockquote class="twitter-tweet">
<p dir="ltr" lang="mr">आयआयटी मुंबईमध्ये साहिल वाकोडे या वीस वर्षांच्या विद्यार्थ्याने आत्महत्या केल्याची अत्यंत दुर्दैवी घटना घडली. परीक्षेदरम्यान त्याने मोबाईल आणि चॅटजीपीटीचा वापर केल्याचा आरोप आयआयटी प्रशासनाने सुरुवातीला केला. हा आरोप तपास पूर्ण होण्याआधी जाहीर करणं अयोग्य होतं, हे मान्य करत…</p>
— Raj Thackeray (@RajThackeray) <a href="https://x.com/RajThackeray/status/2102609551870890472?ref_src=twsrc%5Etfw">September 23, 2026</a></blockquote>
<p>
<script src="https://platform.x.com/widgets.js" async="" charset="utf-8"></script>
</p>
<h2>जे घडलं ते या शिक्षण व्यवस्थेतील आपणच निर्माण केलेल्या दोषांमुळे घडलं- राज ठाकरे (Raj Thackeray On Sahil Wakode)</h2>
<p>आयआयटी <a title="मुंबई" href="https://marathi.abplive.com/news/mumbai" data-type="interlinkingkeywords">मुंबई</a>तील विद्यार्थ्यांनी कौन्सिलिंगची व्यवस्था, चोवीस तास सायकिऍट्रिस्टची उपलब्धता, तक्रार केली तर ती खरंच सोडवली जात आहे यातली पारदर्शकता आणि विद्यार्थ्यांनी शिस्त मोडली तर त्याच्यावर कारवाई करताना तो खचणार नाही अशी व्यवस्था या मागण्या केल्या आहेत. त्यांच्या आंदोलनाची खरी दिशा हीच असली पाहिजे. शिक्षणव्यवस्थेतील दोष दुरुस्त करण्यासाठीच हे आंदोलन पुढे गेलं, तर सरकार आणि प्रशासनाला त्यावर उत्तरं द्यावी लागतील आणि कृतीही करावी लागेल. सत्तेचं राजकारण करण्यात स्वारस्य असणाऱ्यांना जात हा विषय आवडीचा असतो, विद्यार्थ्यांनी त्यात अडकू नये, उलट असल्या राजकारण्यांना त्यांची लायकी दाखवावी. आपल्या सरकारी यंत्रणेतील दोषांवर कोणीही बोलू अथवा आंदोलनं करू नये (कारण पुन्हा केंद्रीय शिक्षण खात यात अडकत , ज्या खात्याच्या मंत्र्याचा आत्ताच राजीनामा मागण्याचं आंदोलन झालं) म्हणून जात धर्माचं शस्त्र वापरून त्यात तुम्हाला अडकवून मूळ विषयापासून तुमचं लक्ष भरकटवायचं हेच सध्या सुरू आहे असं दिसतंय. आयआयटीच काय किंवा कुठल्याही कॅम्पसवरती हे मुद्दे होऊन तुमच्यात मनभेद होतील आणि फूट पडेल असं काही करू नका. साहिल वाकोडे याचा मृत्यू दुर्दैवी आहे. जे घडलं ते या शिक्षण व्यवस्थेतील आपणच निर्माण केलेल्या दोषांमुळे घडलं. यावर काम करणं हीच साहिल वाकोडे आणि त्याच्यासारख्या अनेकांनी ज्यांनी ताण सहन न होऊन स्वतःचा जीव दिला आहे त्यांना श्रद्धांजली ठरेल, असं राज ठाकरे म्हणाले. </p>
<h2>राज्यासह देश-विदेशातील महत्वाच्या घडामोडी, VIDEO:</h2>
<p><iframe title="YouTube video player" src="https://www.youtube.com/embed/a5B0FhXuLoY?si=jNviL5J4J2zebUJc" width="560" height="315" frameborder="0" allowfullscreen="allowfullscreen"></iframe></p>
<h2>संबंधित बातमी:</h2>
<p class="abp-article-title"><strong><a href="https://marathi.abplive.com/crime/iit-bombay-sahil-wakode-says-my-son-was-tortured-and-subjected-to-casteist-slurs-sahil-s-father-makes-serious-allegations-1439904">माझ्या मुलाला टॉर्चर केलं, जातीवाचक शिवीगाळ झाली; साहिलच्या वडिलांचे गंभीर आरोप, आरोपींच्या अटकेची मागणी</a></strong></p>
1 month ago
6 
