बहुआयामी व्यक्तिमत्त्व : बाळासाहेब वाघ

बहुआयामी व्यक्तिमत्त्व : बाळासाहेब वाघ ----------------------------------- शिक्षण हे समाजपरिवर्तनाचे प्रभावी साधन आहे, तर समाजसेवा ही लोकांच्या जीवनात सकारात्मक बदल घडविण्याची प्रेरणा आहे. या विचारांना कृतीची जोड देत शैक्षणिक, सामाजिक, सहकार आणि राजकीय क्षेत्रात आपल्या कार्याचा ठसा उमटविणारे व्यक्तिमत्त्व म्हणजे शिक्षणमहर्षी स्व. बाळासाहेब देवराम वाघ तथा भाऊ. सोमवारी (ता. १९) त्यांची जयंती, त्यानिमित्त... - डी. के. जगताप, सभापती, लासलगाव बाजार समिती निफाड तालुक्यातील रानवडसारख्या छोट्या गावात जन्मलेल्या भाऊंनी शिक्षणाचे महत्त्व ओळखून ग्रामीण विद्यार्थ्यांसाठी शैक्षणिक संधी निर्माण करण्यावर भर दिला. शिक्षणासाठी पुरेशा सुविधा उपलब्ध नसलेल्या काळात त्यांनी शैक्षणिक संस्थांच्या उभारणीसाठी पुढाकार घेतला. त्यांच्या प्रयत्नांतून कर्मवीर काकासाहेब वाघ शिक्षण संस्थेच्या कार्याला बळ मिळाले. या संस्थेच्या माध्यमातून ग्रामीण भागातील विद्यार्थ्यांना शिक्षणाची दारे खुली झाली. शिक्षणाच्या बळावर ग्रामीण तरुणांनी स्वावलंबी व्हावे, रोजगाराच्या संधी मिळवाव्यात आणि समाजाच्या मुख्य प्रवाहात यावे, हा त्यांच्या विचारांचा केंद्रबिंदू होता. त्यांच्या शैक्षणिक दृष्टिकोनात केवळ पदवी मिळविण्याला महत्त्व नव्हते, तर विद्यार्थ्यांनी ज्ञान, संस्कार, सामाजिक जाणीव आणि कर्तृत्व यांच्या जोरावर स्वतःची ओळख निर्माण करावी, ही अपेक्षा होती. त्यामुळेच त्यांचे शैक्षणिक योगदान संस्थांच्या भिंतींपलीकडे जाऊन अनेक कुटुंबांच्या प्रगतीशी जोडले गेले. सहकाराच्या माध्यमातून ग्रामीण भागातील आर्थिक व्यवहारांना गती मिळावी, स्थानिक उद्योगांना चालना मिळावी आणि शेतकरी व सामान्य नागरिकांना रोजगाराच्या संधी उपलब्ध व्हाव्यात, यासाठी त्यांनी प्रयत्न केले. साखर उद्योग, सहकारी संस्था आणि औद्योगिक उपक्रमांच्या माध्यमातून ग्रामीण विकासाला हातभार लावण्याचा त्यांचा दृष्टिकोन होता. रानवड परिसरातील औद्योगिक प्रकल्पांशी त्यांचे कार्य जोडले गेले. शिक्षण आणि सहकार यांची सांगड घालून समाजाच्या सर्वांगीण विकासाचा विचार त्यांनी पुढे नेला. स्व. बाळासाहेब वाघ यांचे जीवन हे शिक्षण, सहकार, समाजसेवा आणि सार्वजनिक जीवन यांचा समन्वय साधणारे होते. त्यांनी उभारलेल्या शैक्षणिक व सामाजिक कार्याचा लाभ अनेक पिढ्यांना झाला. त्यांनी जपलेल्या शिक्षण, सामाजिक बांधिलकी, सहकार आणि लोककल्याणाच्या मूल्यांना पुढे नेणे हीच त्यांना खरी आदरांजली ठरेल.